Agencia Socrates
|
|
Ongi etorri gure Web orrialdera
|
|
|
Euskaldunen lur hau, egundainotik bidaia bide
dugu, beste populu batzuk jarraian menperatua edo indarrez
hartua, erdi arotik beretik, Konpostelako bideetan zabiltzan
beilarien babesleku. Euskal Herria, mendez mende, bere lurretara
zetozen jendeen ekarpenaz eraldatu da. Itsasoari eta munduari
irekia, historian zehar haurrak atzerriratzen ikusi ditu. Egun
batez joan ziren, kanpoko saldaren dastatzera, gogoaren
eraberritzera, edo batzuk beharraren beharrez, ogibidearen
irabaztera. Gaur egun, hamar milioiez goiti dira munduan gaindi,
diaspora handia osatzen dutela, beti beren etxondoa eta herria
bihotzean dauzkatela. Bi Europeen arteko bidegurutzean,
Euskal Herria ez da bakarrik pausaleku goxo bat, bere aire
fresko, kirola eta aisialdi atseginekin ; gure lurraldea, euro-eskualdearen
erdian, osoki antzaldatzen ari da. Gaur egun garena gara, atzean
dugun historia luzeak horrela egin gaituelako... |
Euskal Herria Europako Hego-mendebaldeko
lurraldea da. Aturri ibaitik Ebro ibaia bitarteko lurretan
kokaturik dago. Bi isurialdetan banatua dago: atlantikoa eta
mediterraneoa. Bien arteko muga Pirinioek, Aralar, Aizkorri eta
Gorbeia mendikateek egiten dute. Banaketa hori dela eta, paisaia
desberdintasuna handia da: mendiak, haranak, lautadak, kostaldea... |
|
|
|
Euskal Herria politikoki Frantzia eta Espainia
estatuetan erdibituta dago eta bi estatuon historiak eta
beharrek eragin handia izan dute eta dute Euskal Herriko
ekonomiaren garapenean. Hego Euskal Herrian, Bizkaia eta
Gipuzkoan, industrializazioa Espainiako industrializazioarekin
batera gertatu zen XIX. m.an. Araba eta Nafarroan
industrializazioa geroago iritsi zen eta lehen sektoreak
garrantzi handiagoa izan du hurbileko historian eta gaur egun
ere bai. Bestalde, Ipar Euskal Herrian industrializazioa ez zen
errotu Frantziako industrializazioa gertatu zenean; ondorioz,
lehen sektoreak (abeltzaintza, nekazaritza, basogintza,
arrantza) garrantzi handia mantendu du. Nolanahi ere, hirugarren
sektorea da egun, eta alde handiz, nagusi Euskal Herri osoan,
Frantzian eta Espainian gertatzen denaren antzera. Oro har,
lehen sektoretik populazio aktiboaren % 5-6 inguru baino ez da
bizi; bigarren sektorean (eraikuntza barne) gutxi gora-behera
populazio aktiboaren % 38 ari da eta zerbitzuen sektorean % 56
inguru.
|
 |
|
